堅‧好人　河國榮：大家開心咪得囉

現在河國榮幾咁紅，唔使再講，大家亦知他的成功非朝夕。1987 年，當時22歲的河國榮由澳洲來香港時，先在朋友家暫住，隨後搬到北角僑冠大廈的劏房，居住了一年多。

專程往該地做是次訪問，很久沒回舊居的他望望四周圍追憶片段，然後微笑指着大廈門外行人路說：

以前啲小販一早響度賣油炸鬼，新鮮熱辣、脆，冬天食，好正。

回憶當年，要佢搵滴苦水吐下都冇——儘管明明住在樓下是街市及大馬路，連廁所也須公用，環境無論點都講唔上寧靜寬敞的劏房：

難受？唔會啦，點會？後生仔嚟到新嘅地方，想住好大咩？我嚟呢度唔係為搵靚屋，係為唱歌係為生活。一間房仔，啲租金又 OK，得㗎喇。我唔係要奢侈，有個地方瞓覺就夠啦。

間房有床、雜物櫃、衣櫃，三樣都係路邊執返嚟，新年好多人丟嘢嚮路邊，我就執返去。

當年住劏房時，為儲錢買煮食爐及雪櫃，河國榮每日只食一餐。為煮食卻先要節食，件事幾幽默幾「100 毛」：

依家我都應該要食番一日一餐㗎啦，依家好大個士啤呔。

邊笑邊掐自己的腰說。

▲ 他完全不覺得街市的水積血積污漕：「我農場長大，唔怕污糟，怕污糟就周度唔使去。」

咪咁謙啦！河國榮樣貌及身材不似 50 歲，屬於 fit，原來他一日只吃兩餐：

早上大約 11 點食早午餐，鍾意食沙嗲牛肉飯，少飯。夜晚食三文治，將麵包烘咗一邊，另一邊放塊芝士後再烘，然後夾住澳洲蜜糖、香蕉，再落一啲紅色嘅胡椒，嘩，好正，呢啲係鬼佬先識整。

能屈能伸，他結婚才搬離北角往銅鑼灣住：

都係劏房嚟，但終於有自己廁所。住咗年幾搬去大埔，係買嘅，住咗 8 年之後搬到清水灣，住到依家。

兩個人的成功

要河國榮講太太，他半開玩笑說：

要睇講咩，曾經訪問時講過，佢睇返鬧，佢好低調。」咁講點識得掛？「得，師生戀。」

笑著說：

「87 年年尾，我幫補習社教英文，太太畀足錢上 12 堂，但佢英文老師有咗，我就負責教剩下嘅 3 堂，覺得佢唔開心、孤獨，同佢去街，令佢開心啲，佢又諗住同我去街可以免費學英文，結果堂只上咗 3 堂，拍拖就廿幾年。佢好蝕底㗎，因為一句英文都冇教過佢。

與太太風雨同路廿多年，今日河國榮一登龍門，吐氣揚眉，近日只是專訪也做了十多個的他說：

太太係好開心嘅，因為唔係一個人捱咗咁多年，係兩個人一齊，所以成功都唔係一個人嘅成功，前途迷惘時都係佢撐住，冇佢，我都唔響度啦。

▲ 唱《亞視永恆》的河國榮仲有冇睇亞視？「冇，連無都冇睇，因為依家住果度收唔到電視。」

人氣急升，未來卻未可料：

下一步會點樣，唔知，只有盡量享受盡量開心，但都有少少驚，升得快，會跌得快，果下會好傷。依家唔可以話成功咗，未係，係多咗人留意，但可能忙一陣之麻，有新嘅新聞大家就唔記得。但我唔介意嘅，只可以話依家係個非常開心嘅時期。

眾所周知，他與《 100 毛》結緣於「河布仙尼」封面，當日酬勞只有車馬費而已。河國榮說：

我爸爸話過，無論對咩人，唔理佢咩身份，都盡量對佢哋好。雖然好人未必有好報，咁未必有好報你去唔去做好人？我決定，做，大家開心咪得囉。我當時都唔知《 100 毛》佢哋係邊個，但覺得佢哋有心，唔係純粹為錢，係為『廢青』，就幫囉。

開心源自分享

抱緊眼前人，香港人河國榮在農曆新年時當然會到親戚家拜年：

好大鑊，有個阿叔整角仔好好食，擺響我前面唔使諗啦，一兩日就冇晒㗎喇。太太有 9 兄弟姊妹，過年佢就塞啲利市畀我派。

不過他佻皮地說：

利市要好熟先派，如果依傳統未結婚嘅都畀，破產喇，以前還在 TVB，返去一見就幾十個人，我派唔起啦。如果見到小朋友會畀嘅，但都要佢講聲恭喜發財，冇理由咩都唔使做就畀，唔啱嘅，唔講唔畀㗎。

河國榮還懂打麻雀，以前在新年也會與親戚打雀聯誼：

會專登輸畀媽媽（外母）啦，等佢有錢收，不過係以前，媽媽『走咗』之後就冇。但新年都會去親戚屋企，向媽媽上香，人哋拜年我哋拜神（祖先），有人或者覺得唔鍾意，但我哋覺得係好。

「被合照」不失風度  

早前出席澳洲駐港總領事館的國慶酒會，出名愛動物的河國榮碰到身穿皮草的葉劉淑儀，無奈「被合照」。他基於禮貌沒拒絕也沒黑臉，但識睇都見佢冇咩笑容，巴絲打都讚河國榮處理得恰到好處。

▲ 河國榮喜歡坐電車：「落雨時坐電車，好正。」

提及此事，他仍保持紳士風度說：

唔特別係講葉劉，總之如果一啲人嘅準則、行為唔同你甚至好大分別，可能會嬲，但鬧佢係唔會幫到件事，如果好多人鬧，仲衰，佢會反感，覺得畀人攻擊要保護自己。人係有自尊，可能人哋準備轉彎同意你，但畀人話，覺得尷尬就死啦。

你唔鍾意佢嘅行為，唔代表唔同佢傾偈，如果大家能夠做到 friend 嘅，咁先有機會去影響到佢，如果開炮就鬧，無得進展。

一念，是天堂或地獄：

依家發嬲傳短訊或文章放上網，好易，但一發，收唔番，傷害到人，最終仲傷害自己。試過有人令我唔開心，於是寫好惡嘅短訊，但唔 send 住，隔一日睇返，邊啲有毒嘅，cut 出嚟。

短訊、文章可以寫事實但唔可以話人點衰，如果佢錯，講事實已經夠，佢到咁上下無奈都要接受嘅，但鬧，佢可以唔聽，因為你已經影響緊佢自尊。

整個訪問，河國榮提得最多是開心，筆者覺得開心源自好心、關心。好人冇保證有好報，但你做唔做？新年派利市之外，不如多派一點愛。